بالی وڈ کے معروف اداکار سنجے دت فلم ’سن آف سردار 2‘ کی شوٹنگ کے لیے برطانیہ جانے جانے سے محروم رہ گئے۔
بھارتی میڈیا کی رپورٹ کے مطابق برطانوی حکومت کی جانب سےاچانکہ ان کا ویزا منسوخ کردیا گیا جس پر سنجے دت نے اپنی مایوسی کا اظہار کیا ہے۔
حال ہی میں ایک انٹرویو دیتے ہوئے سنجے دت نے کہا کہ ’میں ایک ہی بات جانتا ہوں کہ برطانوی حکومت نے ٹھیک نہیں کیا۔‘
ان کا کہنا تھا کہ ’تمام تیاری مکمل تھی، میں نے برطانوی حکومت کو سب دستاویزات اور ضروری کاغذات جمع کرا دی تھیں پھر ایک ماہ بعد انہوں نے ویزا منسوخ کردیا ۔‘
سنجے دت نے برطانوی حکومت کے اس اقدام پر ناراضی کا اظہار کرتے ہوئے کہا کہ ’کیوں انہوں نے پہلے مجھے ویزا دیا اور پھر اسے منسوخ کر دیا، قوانین کا جائزہ لینے میں انہیں ایک ماہ کا عرصہ کیوں لگا۔‘
اداکار نے مزید کہا کہ ’بہرحال، اس وقت کون برطانیہ جانا چاہتا ہے؟ وہاں تو ہر طرف فسادات ہو رہے ہیں، بھارتی حکومت نے بھی برطانیہ کا سفر نہ کرنے کی ہدایت کی ہے، اس لیے مجھے اس سے کوئی فرق نہیں پڑتا۔‘
سنجے دت نے کہا ’میں قانون کا پابند شہری ہوں، میں قانون کے مطابق چلتا ہوں اور ہر ملک کے قانون کا احترام کرتا ہوں۔‘
خیال رہے کہ سنجے دت کے خلاف ماضی میں اسلحہ رکھنے کا ایک کیس دائر ہوا تھا جس کے بعد مبینہ طور پر ایک سے زائد مرتبہ ان کے برطانیہ میں داخلے پر پابندی لگائی جا چکی ہے۔
اب اس بات کا امکان ہے کہ 65 سالہ اداکار سنجے دت فلم ‘سن آف سردار’ میں خصوصی کردار باقی کاسٹ کی برطانیہ سے واپسی کے بعد بھارت ہی میں شوٹ کیا جائے گا۔
دوسری جانب اکشے کمار کی فلم ‘ہاؤس فُل 5‘ کی کاسٹ میں بھی سنجے دت شامل ہیں۔
اس فلم کا زیادہ تر حصہ بھی برطانیہ ہی میں شوٹ ہو گا تاہم اس فلم کے پروڈیوسر ساجد نادیاوالا نے سنجے دت سے متعلق سین برطانیہ کے بجائے ممبئی ہی میں شوٹ کرنے کا فیصلہ کیا ہے۔
آئندہ دنوں میں سنجے دت ایک تیلگو فلم ’ڈبل سمارٹ‘ میں جلوہ گر ہوں گے جو بھارت کے یوم آزادی یعنی 15 اگست کو دیگر فلموں ’اسٹریٹ 2‘ اور ’کھیل کھیل میں‘ کے ساتھ کی ریلیز ہو گی۔
