وینٹیانے (ویب ڈیسک) چین کے وزیر خارجہ وانگ ای نے وینٹیانے میں امریکی وزیر خارجہ انٹونی بلنکن سے ملاقات کی ہے ۔ اتوار کے روز فریقین نے چین اور امریکہ کے موجودہ تعلقات پر تبادلہ خیال کیا اور ہر سطح پر رابطے جاری رکھنے اور دونوں سربراہان مملکت کے درمیان سان فرانسسکو سربراہی اجلاس میں طے پانے والے اہم اتفاق رائے پر مزید عمل درآمد پر اتفاق کیا۔
وانگ ای نے کہا کہ گزشتہ تین ماہ کے دوران دونوں فریقوں نے اپنی سفارتی، مالیاتی، قانون نافذ کرنے والی اور موسمیاتی تبدیلی کی ٹیموں کے ساتھ ساتھ دونوں افواج کے درمیان رابطے برقرار رکھے ہیں اور دونوں ممالک کے عوام کے درمیان تبادلوں میں بھی اضافہ ہوا ہے۔ تاہم، یہ واضح کرنا لازم ہے کہ امریکہ نے چین کو روکنے اور دبانے کی اپنی کوششوں کو نہیں روکا ہے، اور یہاں تک کہ اپنی کوششوں کو تیز کر دیا ہے. امریکہ اور چین کے تعلقات کو درپیش خطرات اور چیلنجز بدستور بڑھ رہے ہیں، ایسے میں سمت کے مسلسل تعین، خطرات کا انتظام کرنے، اختلافات سے مناسب طریقے سے نمٹنے، مداخلت کو ختم کرنے اور تعاون کو آگے بڑھانے کی ضرورت ہے.
وانگ ای نے نشاندہی کی کہ چین بالادستی یا طاقت کی سیاست میں ملوث نہیں ہے ، اور امن اور سلامتی کے معاملے پر دنیا کے کسی بڑے ملک کا بہترین ریکارڈ رکھتا ہے۔ کمیونسٹ پارٹی آف چائنا (سی پی سی) کی 20 ویں مرکزی کمیٹی کے تیسرے کل رکنی اجلاس میں اصلاحات کو مزید گہرا کرنے اور چینی طرز کی جدیدکاری کو فروغ دینے کے لئے ایک اہم قرارداد منظور کی گئی ہے۔ امید ہے کہ امریکہ اس قرارداد سے سی پی سی اور چین کے حال اور مستقبل کو سمجھے گا۔
وانگ ای نے واضح کیا کہ تائیوان چین کا حصہ ہے، اور یہ کبھی پہلے نہ ایک ملک تھا اور نہ ہی آئندہ رہے گا.
انہوں نے رین آئی ریف کے مسئلے کو بھی اجاگر کرتے ہوئے کہا کہ چین صورتحال کو سنبھالنے کے لئے فلپائن کے ساتھ ایک عارضی معاہدے پر پہنچ گیا ہے ، اور فلپائن کو اپنا وعدہ برقرار رکھنا چاہئے۔ امریکہ کو آگ کے شعلوں کو مزید بھڑکانے ، پریشانی پیدا کرنے اور سمندری استحکام کو نقصان پہنچانے سے گریز کرنا چاہئے۔
وانگ ای نے مزید کہا کہ چین یوکرین کے مسئلے پر امن مذاکرات کو فروغ دینے کی کوششیں جاری رکھے گا۔
