بیجنگ :چین کی وزارت تجارت نے عوامی جمہوریہ چین کے برآمدی کنٹرول قانون اور عوامی جمہوریہ چین کے دوہری استعمال کی اشیاء کے برآمدی کنٹرول کے ضوابط کی متعلقہ دفعات کے مطابق 20 جاپانی اداروں کو واچ لسٹ اور 20 جاپانی اداروں کو ایکسپورٹ کنٹرول لسٹ میں شامل کرنے کا فیصلہ کیا۔ پیر کے روز چین کی وزارت تجارت کے ترجمان نے اس حوالے سے کہا کہ 24 فروری 2026 کو، چین نے 20 جاپانی اداروں کو اپنی ایکسپورٹ کنٹرول لسٹ میں اور 20 جاپانی اداروں کو اپنی واچ لسٹ میں شامل کیا تھا، جس کا مقصد جاپان کی عسکریت پسندی” اور جوہری عزائم کو روکنا تھا۔ افسوس کی بات یہ ہے کہ ایک عرصے سے، جاپان نے اپنی غلطیوں پر غور کرنے کے بجائے عسکریت پسندی ” کو تیز کرتے ہوئے جارحانہ ہتھیارتعینات کئے اور جارحانہ میزائل بیرون ملک داغے۔ اس صورتحال میں، چین نے نیشنل انسٹی ٹیوٹ فار ڈیفنس اسٹڈیز سمیت 20 ایسے جاپانی اداروں کوچین کی کنٹرول لسٹ میں شامل کرنے کا فیصلہ کیا ہے، جنہوں نے جاپان کی فوجی صلاحیتوں کوبڑھانے میں شرکت کی، اور مٹسوئی ای اینڈ ایس کارپوریشن سمیت 20 ایسے جاپانی اداروں کو چین کی واچ لسٹ میں شامل کرنے کا فیصلہ کیا ہے، جو دوہری استعمال کی اشیاء کے حتمی صارفین اورحتمی استعمال کی تصدیق نہیں کر سکے۔ ترجمان نے اس بات پر زور دیا کہ چین کے اس اقدام کا مقصد جاپان کے "نئی قسم کی عسکریت پسندی” کے اقدامات کو روکنا ہے اور اس کا ہدف صرف چند جاپانی ادارے ہیں ۔ ترجمان نے کہا کہ متعلقہ اقدامات صرف دوہری استعمال کی اشیاء کا احاطہ کرتے ہیں، جو چین اور جاپان کے درمیان معمول کے اقتصادی اور تجارتی تبادلوں کو متاثر نہیں کریں گے۔ اس لیے دیانت دارانہ طریقے سے کام کرنے والے اور قانون کی پاسداری کرنے والے جاپانی اداروں کو ان اقدامات کے حوالے سے کسی فکر کی ضرورت نہیں۔
