قاہرہ :عوامی جمہوریہ چین کے صدر شی جن پھنگ کی اہلیہ پھنگ لی یوان نے قاہرہ میں مصر کے صدر عبد الفتاح السیسی کی اہلیہ انتصار عامر کے ساتھ چائے کی نشست کے دوران گفتگو کی اور دستکاری کی ایک چھوٹی سی نمائش بھی دیکھی۔پھنگ لی یوان اور انتصار عامر کے درمیان چین اور مصر کے درمیان دوستی،افرادی و ثقافتی تبادلوں سمیت مختلف امور پر خوشگوار گفتگو ہوئی۔ پھنگ لی یوان نے کہا کہ مصر ایک طویل تاریخ اور گہرے ثقافتی ورثے کا حامل ملک ہے، نمائش میں رکھی گئیں اشیاء انتہائی خوبصورت ہیں اور ان سے مصری عوام کی ذہانت اور منفرد جمالیات کا بھرپور اظہار ہوتا ہے۔انہوں نے کہا کہ چینی اور مصری تہذیبوں میں بہت سی چیزیں مشترک ہیں، امید ہے کہ دونوں ممالک کے فنکار آپس میں رابطے اور تعاون کو مضبوط کریں گے تاکہ روایتی دستکاری کی وراثت اور باہمی سیکھ کے عمل کو فروغ دیا جا سکے ۔
