برسلز :امریکی صدر ڈونلڈ ٹرمپ کی جانب سے امریکی کمپنیوں پر ڈیجیٹل سروسز ٹیکس لگانے والے یورپی ممالک پر جوابی ٹیرف لگانے کی دھمکی کے بعد، یورپی کمیشن نے اپنے ردعمل کا اظہار کرتے ہوئے کہا ہے کہ وہ "اپنے حقوق کا مضبوطی سے دفاع کرے گا۔” یورپی کمیشن کے ایک ترجمان نے کہا کہ یورپی یونین اور اس کے رکن ممالک کو یورپی یونین کے اندر اقتصادی سرگرمیوں کا انتظام کرنے کا حق حاصل ہے، اور یہ کہ اگر اس کی "جائز پالیسیوں” کے خلاف کوئی "یکطرفہ اقدامات” کیے گئے، تو یورپی یونین اپنے حقوق اور ضابطہ سازی کی خودمختاری کے تحفظ کے لیے فوری اور مضبوط جواب دے گی۔ادھر ٹرمپ نے سوشل میڈیا پر پوسٹ کیا کہ اگر کوئی بھی یورپی ملک امریکی کمپنیوں پر ڈیجیٹل سروسز ٹیکس لگاتا ہے، تو اسے فوری طور پر امریکا میں اپنی تمام درآمدات پر 100 فیصد کے جوابی ٹیرف کا سامنا کرنا پڑے گا۔ یہ ٹیرف امریکہ اور متعلقہ ممالک کے درمیان موجود تجارتی معاہدوں کی جگہ لے لے گا، خواہ وہ معاہدے پہلے ہی نافذ ہو چکے ہوں یا ابھی صرف دستخط کیے گئے ہوں۔ حالیہ برسوں میں،متعدد یورپی ممالک نے امریکی کمپنیوں جیسے گوگل، ایمزون اور ایپل کی کاروباری سرگرمیوں پر ڈیجیٹل سروسز ٹیکس کے نفاذ کو فعال طور پر فروغ دیا ہے، جس کی امریکہ نے سخت مخالفت کی ہے۔رواں سال کے آغاز سے صدر ٹرمپ کئی بار فرانس اور برطانیہ کو بھی محصولات کے ذریعے جوابی کارروائی کی دھمکی دے چکے ہیں۔ دوسری جانب فرانسیسی صدر ایمانوئل میکرون نے واضح کیا ہے کہ فرانس امریکی دباؤ یا دھمکیوں کے باعث امریکی کمپنیوں پر عائد ڈیجیٹل سروسز ٹیکس واپس نہیں لے گا۔
