بیجنگ :جاپان کے ایوانِ بالا نے وزارت دفاع کے قیام کے ایکٹ میں ایک ترمیم منظور کی ہے، جس میں ایئر سیلف ڈیفنس فورس کا نام بدل کر "ایئر اینڈ اسپیس سیلف ڈیفنس فورس” رکھا گیا ہے اور اس کے ساتھ ایک "اسپیس آپریشنز گروپ” قائم کیا گیا ہے۔ بدھ کے روز چینی وزارت دفاع کے ترجمان، سینئر کرنل چھن شی نے اس پر تبصرہ کرتے ہوئے کہا کہ حالیہ برسوں میں جاپان نے کھلے عام خلا کو جنگی میدان قرار دیتے ہوئے اپنی فوجی توسیع پسندانہ خواہشات کا رخ خلا کی جانب موڑ دیا ہے۔اس شعبے میں جاپان کے فوجی اخراجات گزشتہ پانچ برسوں میں دس گنا بڑھ چکے ہیں، جبکہ اس کی خلائی جنگی قوت میں 30 گنا سے زیادہ اضافہ کیا گیا ہے۔یہ اقدامات خلا کو ہتھیاروں سے لیس کرنے اور اسے جنگی میدان میں تبدیل کرنے کے عمل کو تیز کر رہے ہیں، خلائی اسلحے کی دوڑ کو ہوا دے رہے ہیں، اور ایک بار پھر ثابت کرتے ہیں کہ جاپان کا "نیا عسکریت پسندانہ رجحان” اب ایک کھلا اور حقیقی خطرہ بن چکا ہے۔انہوں نے مزید کہا کہ خلا میں پائیدار امن اور سلامتی تمام ممالک کی سلامتی، ترقی اور خوشحالی سے وابستہ ہے۔ امن پسند عوام کو جاپان کی خلائی سرگرمیوں میں پائے جانے والے خطرناک رجحانات پر گہری نظر رکھنی چاہیے، جاپان کی دائیں بازو کی قوتوں کی تیز رفتار "دوبارہ عسکریت” کی کوششوں کو مؤثر طور پر روکنا چاہیے اور پوری انسانیت کے مشترکہ گھر یعنی خلا کے امن و سلامتی کا تحفظ کرنا چاہیے۔
