بیجنگ :امریکہ نے ختم ہونے والے "ہانگ کانگ نارملائزیشن ایگزیکٹو آرڈر” (نمبر 13936) میں موجود ہانگ کانگ سے متعلق نیشنل ایمرجنسی میں توسیع نہ کرنے کا فیصلہ کیا۔اس حوالے سے ایک صحافی کے سوال کےجواب میں چین کی وزارت تجارت کے ترجمان نے کہا کہ چین نے متعلقہ صورتحال کا نوٹس لیا ہے۔ترجمان کا کہنا تھا کہ چین-امریکہ میدرڈ اقتصادی و تجارتی مشاورت میں، امریکی فریق نے ہانگ کانگ، سرمایہ کاری اور دیگر متعلقہ امور پر متعدد وعدے کیے تھے۔ حالیہ دنوں، امریکہ نے چین کو تصدیق کر دی ہے کہ ایگزیکٹو آرڈر نمبر 13936 میں موجود ہانگ کانگ سے متعلق قومی ہنگامی حالت رواں سال کی مدت ختم ہونے کے بعد آگے نہیں بڑھائی جائے گی، اور اس ایگزیکٹو آرڈر کا خاتمہ ہو جائے گا۔ امریکہ کی یہ کارروائی دونوں فریقوں کے درمیان اقتصادی و تجارتی مشاورت میں طے پانے والے اتفاق رائے پر عمل درآمد کا ایک اہم قدم ہے، اور چین اس کا خیر مقدم کرتا ہے۔ترجمان نے مزید کہا کہ ہانگ کانگ کی خوشحالی اور استحکام کا تحفظ چین اور امریکہ کے مشترکہ مفادات سے مطابقت رکھتا ہے۔ ہانگ کانگ سے متعلق امریکی پالیسی کی مثبت تبدیلی، بین الاقوامی برادری کی عمومی توقعات سے بھی ہم آہنگ ہے۔ امید ہے کہ امریکہ متعلقہ بین الاقوامی کنونشنز اور باہمی اتفاق رائے پر قائم رہے گا، چین کی خودمختاری اور ہانگ کانگ خصوصی انتظامی علاقے کی قانونی حکمرانی کا احترام کرے گا، ہانگ کانگ خصوصی انتظامی علاقے کے ساتھ معمول کے اقتصادی و تجارتی تعلقات کو بحال اور مضبوط کرے گا، اور چین-امریکہ تعمیری، اسٹریٹجک اور مستحکم تعلقات کی تشکیل میں مثبت کردار ادا کرے گا۔
