بیجنگ : چین کی وزارتِ خارجہ کے ترجمان لین جیان نے معمول کی پریس بریفنگ میں کہا کہ برکس ممالک کے قومی سلامتی امور کے اعلیٰ نمائندوں کا سولہواں اجلاس 22 سے 23 جون تک نئی دہلی میں منعقد ہوگا۔جمعہ کے روز ایک سوال کے جواب میں ترجمان نے کہا کہ اجلاس کے دوران چین برکس کے رکن ممالک کے ساتھ موجودہ بین الاقوامی سلامتی کی صورتحال، اہم عالمی اور علاقائی امور، نیز روایتی اور غیر روایتی سلامتی کے چیلنجز سے نمٹنے کے طریقوں پر تبادلۂ خیال کرے گا۔انہوں نے بتایا کہ یہ اجلاس رواں سال ستمبر میں ہونے والے برکس رہنماؤں کے اجلاس کی سیاسی تیاریوں کا بھی اہم حصہ ہوگا۔ترجمان کے مطابق چین اس اجلاس کو ایک اہم موقع سمجھتا ہے اور امید کرتا ہے کہ اس کے ذریعے برکس ممالک کے درمیان رابطوں اور ہم آہنگی کو مزید مضبوط بنایا جا سکے گا۔انہوں نے کہا کہ چین برکس ارکان کے ساتھ سیاسی اور سلامتی کے شعبوں میں تعاون کو مزید گہرا کرنے اور مشترکہ مفادات کے تحفظ کے لیے عملی اقدامات کو فروغ دینے کا خواہاں ہے۔ ترجمان نے زور دیا کہ چین برکس شراکت داروں کے ساتھ مل کر عالمی امن و سلامتی کے فروغ، کثیرالجہتی تعاون کے استحکام اور بین الاقوامی نظام میں استحکام پیدا کرنے کے لیے مثبت کردار ادا کرتا رہے گا۔
