بیجنگ :سترہواں 2026 سمر ڈیووس فورم دالیان میں منعقد ہوا، جس میں 90 سے زائد ممالک اور خطوں سے تعلق رکھنے والے 1700 سے زیادہ مندوبین نے شرکت کی۔ چائنا میڈیا گروپ اور سمر ڈیووس فورم نے مشترکہ طور پر بیلٹ اینڈ روڈ کی اعلیٰ معیار کی مشترکہ تعمیر کے موضوع پر ایک ذیلی فورم کا انعقاد کیا، جس میں مختلف ممالک کے رہنماؤں اور ماہرین نے اس عالمی تعاون کے منصوبے پر اپنے خیالات کا اظہار کیا۔اس موقع پر قازقستان کے وزیرِ اعظم اولژاس بیکتینوف نے کہا کہ 2013 میں صدر شی جن پھنگ نے قازقستان میں پہلی مرتبہ بیلٹ اینڈ روڈ انیشی ایٹو پیش کیا، جس نے ایشیا اور یورپ کے درمیان روابط کے ایک نئے دور کا آغاز کیا۔آج یہ وژن عالمی ترقی کے اہم فریم ورک میں تبدیل ہو چکا ہے۔ گزشتہ ایک دہائی سے زائد عرصے میں بیلٹ اینڈ روڈ انیشی ایٹو نے ثابت کیا ہے کہ جیسے جیسے باہمی روابط میں اضافہ ہوتا ہے، ترقی کے مواقع بھی کئی گنا بڑھ جاتے ہیں۔بیکتینوف نے مزید کہا کہ چین کا "پندرہواں پانچ سالہ منصوبہ” مزید ممالک کے لیے ترقی اور تعاون کے نئے مواقع پیدا کرے گا اور مشترکہ خوشحالی کے عمل کو آگے بڑھانے میں اہم کردار ادا کرے گا۔فورم میں شریک دیگر مندوبین نے بھی اس بات پر زور دیا کہ بیلٹ اینڈ روڈ کی اعلیٰ معیار کی مشترکہ تعمیر نے عالمی سطح پر توانائی کی منتقلی اور پائیدار ترقی کے فروغ میں اہم کردار ادا کیا ہے۔
