چین اور ایکواڈور کو سیاسی باہمی اعتماد کو مستحکم کرنا چاہیے، چینی صدر

بیجنگ:چینی صدر شی جن پھنگ سے بیجنگ کے عظیم عوامی ہال میں چین کے سرکاری دورے پر آئے ایکواڈور کے صدر ڈینیئل نوبوا نے ملاقات کی۔منگل کے روزشی جن پھنگ نے کہا کہ رواں سال چین اور ایکواڈور کے درمیان جامع تزویراتی شراکت داری کے قیام کی 10ویں سالگرہ ہے۔ بین الاقوامی صورتحال میں چاہے کتنی ہی تبدیلیاں کیوں نہ آئیں، چین ہمیشہ تزویراتی اور طویل مدتی نقطۂ نظر سے چین۔ایکواڈور تعلقات کو دیکھتا ہے اور ایکواڈور کے ساتھ مل کر دوطرفہ تعلقات کو مسلسل نئی بلندیوں تک پہنچانے اور دونوں ممالک کے عوام کے لیے مزید فوائد پیدا کرنے کا خواہاں ہے۔شی جن پھنگ نے زور دیا کہ دونوں ممالک کو سیاسی باہمی اعتماد کو مستحکم کرنا چاہیے اور ایک دوسرے کے بنیادی مفادات اور اہم خدشات سے متعلق معاملات میں باہمی ہم آہنگی اور حمایت جاری رکھنی چاہیے۔ چین ایکواڈور کی جانب سے اپنے قومی حالات کے مطابق ترقی کی راہ تلاش کرنے کا احترام اور حمایت کرتا ہے۔ چین دونوں ممالک کی حکومتوں، قانون ساز اداروں اور سیاسی جماعتوں سمیت مختلف شعبوں کے درمیان روابط مضبوط کرنے اور حکمرانی کے تجربات کے تبادلے میں اضافے کا خواہاں ہے، تاکہ دونوں ممالک اپنی اپنی جدیدیت کی راہ پر ایک دوسرے کے ساتھ آگے بڑھ سکیں۔شی جن پھنگ نے مزید کہا کہ چین۔ایکواڈور تعلقات میں ہونے والی متعدد نئی پیش رفت دونوں ممالک کے آزاد تجارتی معاہدے سے حاصل ہونے والے فوائد اور چین کی وسیع مارکیٹ کی صلاحیت کی عکاسی کرتی ہے۔ دونوں فریقوں کو ترقیاتی حکمت عملیوں میں ہم آہنگی بڑھانی چاہیے، بیلٹ اینڈ روڈ کی مشترکہ تعمیر کے تعاون کے منصوبے پر عمل درآمد کرنا چاہیے، توانائی، معدنی وسائل، بنیادی ڈھانچے کی تعمیر اور مالیات سمیت مختلف منصوبوں کو بہتر انداز میں آگے بڑھانا چاہیے، جبکہ ڈیجیٹل معیشت، سبز ترقی، نئی توانائی اور مصنوعی ذہانت سمیت شعبوں میں تعاون کے امکانات تلاش کرنے چاہییں۔ دونوں ممالک کو آزاد تجارتی معاہدے کی صلاحیت سے مزید فائدہ اٹھانا چاہیے تاکہ اس کے فوائد زیادہ سے زیادہ کاروباری اداروں اور صارفین تک پہنچ سکیں۔ صدر نوبوا نے کہا کہ چین ایکواڈور کا اہم شراکت دار اور دوست ہے اور صدر شی جن پھنگ ایک عظیم رہنما ہیں۔ ایکواڈور چین کے ساتھ سیاسی باہمی اعتماد کو مزید گہرا کرنے، چین کی خودمختاری اور علاقائی سالمیت کے تحفظ کی حمایت اور تائیوان کے معاملے پر چین کے مؤقف کا احترام کرنے کا خواہاں ہے۔ملاقات کے بعد دونوں سربراہانِ مملکت نے سبز صنعت، تجارتی و اقتصادی تعاون، ڈیجیٹل معیشت اور عوامی فلاح و بہبود سمیت مختلف شعبوں میں تعاون کی متعدد دستاویزات پر دستخطوں کی تقریب میں بھی شرکت کی۔