چینی صدر شی جن پھنگ کے خصوصی نمائندے اور چین کے نائب صدر ہان زنگ نے ترکیہ میں اقوام متحدہ کے فریم ورک کنونشن آن کلائمیٹ چینج (COP31) کے فریقوں کی اکتیسویں کانفرنس کی انطالیہ لیڈرز سمٹ میں شرکت کی اورخطاب کیا۔
ہان زنگ نے کہا کہ صدر شی جن پھنگ نے کہا ہے کہ موسمیاتی تبدیلیوں سے نمٹنا تمام بنی نوع انسان کا مشترکہ نصب العین ہے۔ اس وقت عالمی موسمیاتی تبدیلی کے منفی اثرات تیزی سے ظاہر ہو رہے ہیں۔ نئی صورتحال کے پیش نظر انہوں نے چار تجاویز پیش کیں۔ پہلی، اجتماعی عمل کو مضبوط بنایا جائے اور مشترکہ مگر مختلف ذمہ داریوں کے اصول پر عمل کیا جائے۔ ترقی یافتہ ممالک کو کاربن اخراج کی کمی کے حوالے سے اپنے اہداف حاصل کرنے کے ساتھ ساتھ موسمیاتی تبدیلیوں سے نمٹنے کے لئے فنڈنگ کے وعدوں کو پورا کرنا ہوگا۔ دوسری، سبز تبدیلی کو تیز کرتے ہوئے اعلیٰ معیار کی سبز ٹیکنالوجیز اور مصنوعات کے آزادانہ بہاؤ کو فروغ دیا جائے اور اقتصادی و صنعتی ڈھانچے کی تبدیلی اور اپ گریڈیشن کوآگے بڑھایا جائے۔ تیسری، موسمیاتی خطرات کو روکا جائے۔ چین مزید ممالک میں موسمیاتی ابتدائی وارننگ کے ذہین سسٹم “ما زو” کے اطلاق کو فروغ دینے کے لیے تیار ہے تاکہ مختلف ممالک کو موسمیاتی خطرات کو روکنے اور ان سے نمٹنے میں مدد ملے۔ چوتھی، بین الاقوامی تعاون کو گہرا کیا جائے۔ ترقی پذیر ممالک کی حمایت اور مدد کو مضبوط بنایا جائے۔ چین “گلوبل ساؤتھ کلائمیٹ ایکشن لیڈرز پروگرام” کے تحت صلاحیت سازی کا ایک منصوبہ شروع کرے گا۔
